Влес Кнiга  Iсходны словесы | Выразе | Азбуковник | О памянте | Будиславль 
  на первую страницу Весте | Оуказiцы   
Песни Русинов-Лемков в Галиции, собранныя Алексеем Ивановичем Торонским
от 06.12.08
  
О памянте



1 Зойди, месячку, зойди, месячку, так як мой кой млынске коло;
Выйди, девчино, мое серденько, прогвари до мня слово!
- Як же я маю, як же я маю, до тебе выходити,
Люде говорят, люде боронят, жебы тя не любити!
- Нехай говорят, нехай боронят, аж по целом свету,
А я тя люблю, любити буду, ты мой рожовый квету!
- Жадна пташина без товариша не пребывае в лесе,
А ты поехал, мене поняхал, як ластовоньку в стресе!
А ты поехал, мене поняхал, а я, бедненька плачу,
Сплакала мь очи, як в день, так в ночи, што света не бачу. -
Ей волы мои половенькии, чом вы ми не орете?
А лета мои молоденьки, як ми марне чинете!
А волы мои половенькии, перестаньте орати,
А лета мои молоденьки, перестаньте гуляти!
Ой летев орел та под над море, немилостиво кряче:
Каждый отец и кажда мати за своим сыном плаче!
Ой летев орел та под над море: Дай, море, пити!
А трудно мене молоденькому в чужой стороне бытии.
Выросла травка барзь высокая, побродили ей люде:
Не было правды в нашей стороне, а ни юж ей не буде.
Як на Подолю, так на Подгорью голосененьки звоны;
Поклонитеся своей родине, не вернуся николи!

2 Гавране, гавране, высоко летаешь,
Высоко летаешь, далеко выжаешь.
Ци ты не видел ты там мои штыри волы,
Мои штыри волы, все штыри половы?
- Ой видел я, видел, на высокой горе,
На высокой горе отец нима оре,
Отец нима оре и все тя споминат:
Нет моей девоньки навертац волоньки. -
Твой настарший братик пшеничку сее,
Пшеничку сее и все тя споминат:
Нет моей сестрички вынести пшенички. -
Середушный братик борониц ся сберат,
Борониц ся сьерат и все тя споминат:
Нет моей сестрички навертац коничкы. -
Твоя стара мати за кроснами седит,
За кроснами седит и все тя споминат:
Нет моей девоньки навивац чолоникы.
Наймолодший братик пистолет вытерат,
Пистолет вытерат, за тобов ся сберат. -
Скоро того девча, скоро выслухало,
Зараз ся от жалю на прах розсыпало;
А чорны гавраны погреб отправляли,
А дробны птачькое барз красне спевали!
Вшитко ся кланяло, древо и кореня,
Древо и кореня и вшитко створеня;
Лем ся не вклонила несчастна осика:
Бодай ся трепала от ныне до века,
От ныне до века, до века вечного,
До века вечного, до суду страшного!

3 Приснил ми ся сон дивненький,
Же ми хорый брат родненький.
Треба кони запрягати,
До братенька поехати. -
Як видел брат сестру свою,
Гварит до жены посполу:
Сховай, жжено, хлеб зо стола,
Бо ту иде сестра моя.
- Цыть, братоньку, не страхайся,
Хлеб зо стола не ховайся!
Не иду тя выедати,
Лем тя иду отвижати.
Плыне вода, а все буде,
Мы помреме, а хлеб буде.
- Тече вода, и все текла,
Моя сестра правду рекла.

4 Ой тату, татоньку, лем есь мня едну маль,
И то ту ты мене далеко от ся даль,
За гори высоки, за лесы глубоки,
Лем по поли хожу и лишеньки свожу!
- Цыть ле ты, девонько, цыть ле ты, небого;
Машь ты девять братов, мене десятого,
Мене десятого, вотця старенького,
Як ми ся зойдеме, кривду оженеме. -
Пришли они, пришли, перед новы врата:
Отворь же нам, отворь, наша сестра власна!
- Я вам не отворю, бос я мужа бою,
Мои белы ручкы назад повязаны,
Мои дробны ключи ёму под главами.
- Жено моя люба, с ким ты там говоришь,
С ким ты там говоришь, чому му не отворишь?
- Ишли люди, ишли до места нового,
Дороги не знают, мене ся пытают.
- Вара, жено, вара з той тюрнички зараз,
Бо юж ся не будешь по ней прохожала.
- Теперь сте ми, братья, кривдоньку огнали,
Мои дробны кости на прах розсыпали!

5 Летела пава, летела,
Сребны кветочки, злоты перечка роняла;
Летела она без горы,
До своей любой ростомиленой матери.
Там ей веселье стояло,
Штыре трубаше, пять пахолят ей грало:
Грайте, трубаще, весело,
Покля ми венец, златый перстенец на главе;
- Бо як я го ся посбуду,
И половина така весела не буду!

6 Ой заквитли фиялоньки, заквитли,
Целы горы и долины закрыли,
Ходит по них Марисенька спышная,
За нев, за нев ей мати стихая:
Не ходи же ты, моя мати, за мною,
Не мила ми розмова с тобою.
- Лем ми мила розмовонька с ким иншим,
Тим Василём молоденьким намильшим.

7 Козак коня напавае,
Девча воду наберае:
Девче, девче! - подь же с нами,
С молодыми Козаками! -
Девча дурне послухало,
С козаками поехало,
Ишли ночку и другую,
А на третью стали стати,
Казал козак ложка слати:
- Не мати мня выдавала,
Жебы я ти ложка слала;
Выдала мня воля моя,
Несчастная доля моя! -
А з суботы на неделю
Вышло девча на могилу,
Попатрило на долину:
На долине фиялочки,
Сбирают их паняночки
На неделю на веночки.
- Девча стало, заплакало:
До матерее отказало:
Няй ся мати не фрасуе,
Няй ми вено не готуе,
Бос я уже свеновала,
С козачками поехала!

8 Ехали Козацы,
И Галинка с нима;
Што будешь робила,
Галенько едина?
- Буду шаты прала,
По таляру брала. -
Де ж их будешь прала,
Галенько едина?
- На тихом Дунаю,
Козаче, гультаю!
- Де будешь сушила,
Галенько едина?
- На едвабном снуре,
Козаче, байдуре!
- Чем будешь качала,
Галенько едина?
- Златов качальничков
И сребным прайничком.
- Де ж будеш качала,
Галенько едина?
На липовом столе,
Козаче, соколе!

9 (О Саве) Пошов пан Сава, забавился
В попа на обеде,
Та юж запомнул та пан Сава
О своей тяжкой беде.
Стоит явор над водою,
В землю похилился:
Иде Сава з Украины,
Юж кус засмутился.
- Гаразд, гаразд, челядонько,
Як ся ми маете?
Бо я ходжу вандруючи,
Як ту газдуете?
- Гаразд, гаразд, пане Саво,
Добре ся нам поводить,
Ваша жена, наша пани,
Сына нам породит.
Сел сой Сава конец стола.
Листоньки сой пише,
А Савова молодая
Детину колыше.
Иди, девко, до пивници,
Втоги ми горелки,
Нехай я ся напию
До свей любой женки!
Иди, хлопче, до пивницы,
Втоги мене вина,
Нехай я ся раз напию
До своего сына!
Сидит Сава конец стола,
Листоньки читае,
А Савова молодая
Детину купае.
- Иди, хлопче, до пивницы,
Втоги там ми меду,
Маме мы сам тех таляров,
Як едного леду! -
Еще хлопец не повернул
З той новой пивници,
Полно Ляхов-Гайдамахов
В Савовой светлице.
- Гаразд, гаразд, пане Саво,
Як ты нам ся маешь?
Далекие гости маешь,
Чем их привитаешь?
- Дал бы мь вам вина-пива,
Не будети пити,
Лем вы мене молодого
Хочете сгубити! -
Взяли Саву, поднесли го:
Позри на маеток свой,
Же есь ходил, рабуючи,
Теперь не буде твой.
Ой не едень пресердечне
Горенько заплакал:
А ты ходил, гуляючи
За ёго працу сь скакал. -
Взяли Саву на три пики,
Поднесли го горе:
Ой поведай, пане Саво,
Де сь пеняжки подел?
- Дробненьки попропивал,
Беленьки емь сменял,
А сивеньки кониченьки
Панам ем даровал.
А на ж ти ты, пане Саво,
То за твои збытки,
Не ходе церкви рабуючи,
До села Вербитки.

10 На поляне, на Туряне,
Лежит Янчик порубаный,
Порубаный, постреляный
И кулями спробиваный.
Пришол к нёму отец ёго:
Сыну, сыну, што ту робишь?
Чом до дому не приходишь?
Юж сем рочков як воюешь,
Де ж есь товар поподавал?
- Тату, тату, идь до дому,
Не робь жалю сердцу мому!
Не пыташься, што мя болит,
Лем ся пыьашь о товаре!
На поляне, на Туряне, и проч.
Пришла к нёму мати ёго, и проч.
На поляне, на Туряне, и проч.
Пришла к нёму мила ёго,
Кричит, плаче, жалуе го:
Милый, милый, што ту робишь?
Чом до дому не приходишь?
Шату драгу розодрала,
Его рану завивала.
- Лепше миленька,
Як маты родненька.

11 Плывало девчатко по тихому Дунаю,
Перехожатся отец по зеленому гаю:
Ей тату, таточку, помож ми приплынути;
Бо южь ми приходит в Дунайку загыннути!
- Девко моя люба, бодай сь загинула,
Бодай сь загинула, б ось недобра была!
Плывало девчатко по тихому Дунаю, и проч.
Перехожатся мати по зеленому гаю:
Ей мати, матенко, помож ми приплынути,
Бо южь ми приходит в Дунайку загиннути! и проч.
Плывало девчатко по тихому Дунаю, и проч.
Перехожатся братик, сестра и проч.
Плывало девчатко по тихому Дунаю, и проч.
Перехожатся милый по зеленому гаю.
Милый ся прихопил, за ручку го вхопил,
За ручку го вхопил, за Дунайку выхопил.
- Лепший мой миленький,
Як отец родненький.

12 Верх Бескида зеленого
Пасе Янчик коня свого,
Пасе, пасе, попасуе,
На коничка посвистуе:
Коничку мой чорногривый,
Чом есь смутный, невеселый?
Цы ти шкодит сбруя моя,
Цы сабличка cоболева?
- Не шкодит ми збруя твоя,
Ни сабличка соболева ,
Лем ми шкодят фальши твои:
Ходишь на ми до милои.
Сам сой подешь до милои,
Мене ставишь на выгоне,
Ты сой подешь до светлици,
Ми не дадут соломици.
Тобе дадут ести, пити,
Мене выйдут дети бити;
Тобе дадут винця-пивця,
Ми не дадут а ни синця.
Кобысь ми дал жменку зерна,
Подскочил бы мь так як серна;
А я не мам свечки, соломы,
Юж мя сьедят сорокы, вороны!

13 Пошло девча на воду,
До зеленого огороду,
Нашло собе барвенец,
Зачало вити венец.
Пришол к нему младенец:
Девче, девче, дай венец!
- Не дам я ти тот венец,
Бо ты с пекла отменец.
- По чём же сь мня познала,
Же ся мня отменцом назвала?
- Познала мь та по мове, по ходе,
По отменской подобе. -
Як го вхопил за власы,
Полетел с ним през лясы;
Як с ним пришол над пекло,
Ударил с ним у вокно.
- А вы, старши, выходите,
И ворота отворьте!
- Што там таке несете,
Же отвориц кажете?
- Несу душу и тело,
Две душечки сронило,
Две душечки спалило,
А и третью мыслело,
Все в веночку ходило.
Дайте же му смолу питии,
Няй привыкать с нами бытии,
Кажте же му ложе слати,
Няй привыкать с нами спати! -
Прохожатся по пекле:
Боже, Боже, як ту зле!
Вышло собе над пекло:
Боже, Боже, як тепло!
Як тепло вдарило,
Чорны очка спалило.
- Жебы бы кто з Моравы,
Отказала бы мь до мамы:
Мае мама две цуры,
Няй им не даст потуги;
Ми потуги давала,
До пекла мня нагнала,
От церкви мня боронила,
До корчмы мя гонила.

14 Откыль соненько сходило,
Там девча яблонь садило:
Росни, яблонко, высоко,
Во сто вершеньков широко;
Квитни, яблонко, белено,
Родь ми яблочко червено.
Родь же ми едно, або две,
Як мои личка обедве!
Подуй, ветроньку, з Дуная,
Сваль ми яблочко з конаря,
Сваль же ми едно, або две,
Едно милому, друге ме.
Кому ж я го мам даровати?
Даровала бы я го старому, -
Не мило сердце мому,
Лем го дарую молодому, -
То мило сердцу мому.

15 Сошла нам ся новина,
Пани пана забила,
В огородку го сховала,
Рутку на нем посеяла:
Росни, рутка, высоко,
Як пан в землю глыбоко. -
А рутка ся збахтала,
Аж до вокна достала.
- Поздри, девко, в густый ляс.
Ци не идее кто до нас?
- Идут, идут панове,
Небощика братове.
- По чём же сь их познала,
Же сь их братьми назвала?
- По коничку сивавом,
По узде злотавой.-
Пришли они до двора:
Выходь до нас братова.
Наша невесть немила!
- Де сь нам брата подела?
- На войну мь го послала.
- Мы там тадыль ехали,
Были б ми го познали.
Наша невесть немила,
Чом ти кровця по стенах?
- Девка курку заржнула;
Бос я гостей сподела.
- Хоц бы десять заржнула,
Така бя кровь не была.
Наша невесть немила!
Чом ти дети смутныи?
Ци ти хлебец не ели?
Ци ти винце не пили?
- О ели мы, пили мы,
Але нам есть немиле,
Бо наш отец на ложе,
Серденько му на ноже. -
Як ей взяли в густый ляс.
Та з ней сняли злотый пас,
- Не будешь ся пасала,
Не ты ся ним старала;
Постарался кто инший,
Наш братенько наймильший.
- Ведте же нас без Краков,
Маю я там трех братов,
Мене братя откуплят.
- Сребла, злата, не хочеме,
Лем смерть за смерть кладеме.

16 Ты, девко же, девко,
Ци подешь ты за мня?
(Припев) Гоп, гоп, гоп, дзюм, дзюм, дзюм!
Фиямь, фиямь та я ямь!
Ци подешь ты за мня?
- Ой поду я, поду,
Лем ты по мене прийдь.
(Припев) Лем ты по мене прийдь.
Пришли они по ню,
С трёма возиками.
(Припев) С трёма возиками.
На едном возику
Сребло и золото
(Припев) Сребло и золото
На другом возику
Скринка и перинка
(Припев) Скринка и перинка
На третом возику
Сидят молодята
(Припев) Сидят молодята
Ишли они, ишли
Чрез великы мосты
(Припев) Чрез великы мосты
Впали они, впали
Аж до глыбости
(Припев) Аж до глыбости

17 Королева сова веселя справляла,
А зозуля сестра рады додавала,
Заяц прибегает с великими дарами,
С кашов и крупами.
- Приймите заяца
До свого палаца!
- А когут с курочков житце молотили,
А Качур с качечков до млына возили;
Баран муку меле,
Вовця мерку бере,
Комар воду носит,
Блоха тесто месит.
А сера гусонька хлеб до пеца сажат,
Гусак на но сычит,
Хлеб до пеца лечит;
Цыть же, момотливый,
Бо сь ми хлеб помылил!
А медведь басуе,
Волк с козов танцуе:
Гоя, козо, гоя!
Бо ты будешь моя. -
Як ся розограли
В поле поехали

II Песни, поемыя в великом посте

1 (о кончине человека) Еще солнце не зашло,
Спати положуся,
До споведи ще беруся,
Богу помолюся.
Описуют сребло, злото,
Дорогие шаты,
А южь мене ничь с собою
Не братии.
Хоц бы я брал, хоц не брал,
Там того не треба,
Штыри дошки, сягу земли,
Спасения з неба.
Як задзвонят во все дзвоны
О девятой године,
Подякую сему свету
И своей родине.
А як поймут грешнее тело
В глыбокыи долы,
Як засыплют глынов очи,
Не гляну николи.
Юж я иду до гробу
Темного, смутного,
Де ж я буду спочивати
Аж до дня судного?
Ни месяц, ни солнце
Не засветят больше,
Де жь я буду мати
Во гробе местце?
Ни свет не обачу,
Ни глас не услышу,
Лем я поду лежати
В вечну темницу.
Зламаное ребро, кости,
Зламаные руки,
Душа пойде несмертельна
На вечныи мукы.
Душа пойде несмертельна
На вечную страту,
А як ми кто Богу служит
Так бере заплату.
Все панове, монархове
И бедакы темны,
Кладут во гроб свое тело
И кости мизерны.
Будьте ми здоровы,
Суседы коханы,
Пришол час, година
Ростатися с вами!
Бувай ми здорова,
Наймильша названа,
Была ты ми вдячна
По все кохана!
Няй тя Бог пожегнае,
С тыма сиротами,
Што есть ласки Божой,
Няй ся дье с вами!
А я в теперешнем
Разе не жалую,
Бо я ся уже до Чорной
Земли готую.

2 В раю ми, в раю в том небесном раю,
Стоит ми там, стоит округлый столичок,
А за нам ми седит сам Сынонько Божий,
А перед ним служит душа справедлива.
Душа справедлива словце прогварила:
Ей Боже, Боженьку, спусти же ты мене,
Спусти же ты мене до моей матери;
Бо в моей матери двояке веселя:
Брат ме ся женит, сестра замуж иде;
Будут они собе дары даровати.
Ми не будут, бо о ми забудут.
- Душа справедлива, я тобе не сперам,
На там том свете стати,
Если ты хочешь другий раз вмерати.
- Волю я, Боже, о ничем не знати,
Маю я, маю другий раз вмерати.
Юж сем рочков сполна як ем умерала,
Все ми горко в горле, штом тяжко конала!

3 (о страстях Господних) Ишол Христос, ишол до Ерусалима,
А Божия Мати плачучи за нима:
Сыну мой, сыну! сьедналесь сой слугу,
Слугу неверного, Юду проклятого. -
Велел есь ся Юда на порох розсыпати,
Мал есь Пана Христа Жидом запродати.
Жиды неверницы, Жиды проклятницы,
Били, мордовали, не мали жалости,
Аж му было видно его святы кости;
Тернову корону на главу складали,
А руце и нозе на крест пригвожджали:
А Божая Мати под крыжом стояла,
Под крыжом стояла, с жалью омлевала:
Ой сыну мой, сыну, же бы сь мня ближе был,
Прецеж бы ты з мене да яку помочь мел,
Преци бы я тобе голову подперла,
И з твого личенька святу кровцю стерла. -
А ты, святый Петре, чого ж ты там стоишь?
Чом тоту невесту, чом ей не утолишь?
Утоль же ей, утоль, яко матку свою,
Будешь пребывать в небе враз со мною!

4 Ой повечь же ми, соловею, правду,
Де я свого Спасителя найду,
Ци ли на горе, ци ли на долине,
Ци ли на крыжовой висит деревине?
Горы и долины треба розмеряти,
А на той горе треба умерати.
На полудне солнце наступае,
А юж на кресте Христос умерае.
Жиды взяли, во гроб поховали,
И камением запечатовали;
Жаворонок пискать, в гору ся подносит.
Господу Богу погреб оголошать.
- Ты, голубе, дармо не гуркаешь,
Господу Богу погреб отправляешь. -
Ище пташкове жалостно пискали,
Господу Богу погреб отправляли.
Христос Спаситель сам словенько мовит:
Нехай ко мне святый Петро ходит! -
Скоро святый Петро тое услышавши:
Ой йду зараз, - слезами залявши.
Ой выбавил ему всех грешников з мукы,
А на тое месце отдам Юду в рукы.

5 (О Лазаре) Был там богач богатый,
И во сребле, во злате,
А Лазаря брата мал,
А на бога ничь не дбал.
По обеде, по банките
Пошол богач на прохажкы,
А Лазарь го высмотрел:
Ей богачу, брате мой,
Вынес, вынес хлеба ми! -
Он ся до него озвал:
Што ты брешешь, сгнилый псе,
Ни о хлебе, ни о воде,
Не пышь же ся в моем роде!
Пошол богач до костела,
Не далеко обходил,
Жебы го Лазарь не видел.
А Лазарь го высмотрел:
Ей богачу, брате мой,
Вынес, вынес хлеба ми.
Вынес, вынес воды, хлеба
Заплатит ти Пан Бог с неба,
Кой ти найбарже буде треба! -
- Он ся до него обозвал:
Юж есь ми ту надоел,
Палацы сь ми засмердел. -
Лепши были псы-скотина,
Як богач брат-родина,
Скоркы с хлеба сберали
Лазареви давали.
Выгварил Лазарь молитву:
Боже, Боже мой,
Або мене подоймий,
Або мня возь к собе!
Не выстала година,
Пришла Лазареви новина:
Сберайся Лазарю, с нами,
Ми твои слугове,
Ти з неба  ангелове. -
Пошли они с ним далеко,
Аж на небо высоко:
Зажий, Лазарю, ложе того,
Не зажиль есь такового. -
Не выстала година,
Пришла богачови новина:
Сберайся, богачу, с нами,
Бо ми твои слугове,
З пекла пекельны дьяблове.
- А я ся вас не бою,
Я ся от вас откуплю,
А сь Богом ся выбию,
Бо большую силу маю. -
Пышну челядь порозганяли,
И палацы порозваляли.
Видал богач, же не жарты,
Зачался сам сберати,
Сребло, злото до кишени пхати.
Пошли они с ним далеко,
Аж до пекла глыбоко:
Зажий, богачу, трунку мого,
Не зажиль есь такого:
Звык ты вшелякы банкеты справляти,
Вшелякы трункы попивати. -
Як он ся того напил,
За серденько ся улапил,
Позрел богач далеко,
Аж на небо высоко.
Видел там Лазаря брата свого:
Ой, Лазарю, брате мой,
Омочь палец, закропь язык мой!
- Хоц бы ти спустил целее море,
Юж ти брате не поможе!

  

  
СТАТИСТИКА

  Веб-дизайн © Kirsoft KSNews™, 2001